ଓଡ଼ିଶାର ନଦୀ ସମୁହ

ଓଡ଼ିଶାର ନଦୀ ସମୁହ

ମହାନଦୀ

          ମହାନଦୀ ଓଡ଼ିଶାର ସବୁଠାରୁ ବଡ଼ ନଦୀ | ଏହା ଛତିଶଗଡ଼ର ଅମରକଣ୍ଟକ ମାଳଭୂମିରୁ ବାହାରି ଝାରସୁଗୁଡ଼ା ଜିଲ୍ଲାରେ ଓଡ଼ିଶାକୁ ପ୍ରବେଶ କରିଛି | ଏହାର ଦୈର୍ଘ୍ୟ ପ୍ରାୟ ୮୫୭ କି.ମି. | ପାରାଦ୍ଵୀପ ନିକଟସ୍ଥ ବତୀଘରର ଦକ୍ଷୀଣକୁ ବଙ୍ଗୋପସାଗରରେ ପଡ଼ିଛି | ଏହା ଭାରତର ଷଷ୍ଠ ବୃହତ୍ତମ ନଦୀ ଓ ଓଡିଶାରେ ଏହାର ଦୈର୍ଘ୍ୟ ୪୯୪ କି.ମି. |

          ବୌଦର ସୁନାଖଣିଆଠାରୁ

ଦଶପଲ୍ଲାର ମଧ୍ୟରେ ଏହା ଏକ ଗଭୀର ଗଣ୍ଡ ସୃଷ୍ଟି କରିଛି | ତାହାକୁ ସାତକୋଶିଆ ଗଣ୍ଡ କୁହାଯାଏ | ବନ୍ୟା ନିୟନ୍ତ୍ରଣ , ଜଳ ବିଦ୍ୟୁତ୍ ଉତ୍ପାଦନ ଓ ଜଳସେଚନ ଉଦ୍ଦେଶ୍ୟରେ ଏହି ନଦୀ ଶଯ୍ୟାରେ ହୀରାକୁଦଠାରେ ଏକ ଡ୍ୟାମ ଓ ଯୋବ୍ରାଠାରେ ଏକ ବ୍ୟାରେଜ ନିର୍ମାଣ କରାଯାଇ କୃତ୍ରିମ ଜଳଭଣ୍ଡାର ସୃଷ୍ଟି କରାଯାଉଛି | କଟକ ଠାରୁ ଏହି ନଦୀର ତ୍ରିକୋଣ ଭୂମି ଆରମ୍ଭ ହୋଇଛି | ନିମ୍ନଶଯ୍ୟାରେ ଏହା ଅନେକ  ଶାଖାନଦୀରେ ବିଭକ୍ତ ହୋଇଛି | ସେଗୁଡ଼ିକ ମଧ୍ୟରେ କାଠଯୋଡ଼ି, କୁଆଖାଇ, ବିରୁପା , ଦେବୀ, ଦୟା ଓ ଭାର୍ଗବୀ ମୁଖ୍ୟ | ଓଡ଼ିଶା ଭିତରେ ତେଲ ଓ ଇବ୍ ମହାନଦୀର ଦୁଇଟି ମୁଖ୍ୟ ଉପନଦୀ |

ବ୍ରାହ୍ମଣୀ

          ଶଂଖ ଓ କୋଏଲ୍ ନାମକ ଦୁଇଟି ନଦୀ ଛୋଟନାଗପୁର ମାଲଭୂମିରୁ ବାହାରି ରାଉରକେଲା ନିକଟସ୍ଥ ବେଦବ୍ୟାସଠାରେ ମିଳିତ ହୋଇ ବ୍ରାହ୍ମଣୀ ନାମକ ନଦୀ ଧାରଣ କରିଛନ୍ତି | ଏହା ଓଡ଼ିଶାର ୨ୟ ବୃହତ୍ତମ ନଦୀ | ବୈତରଣୀ ସହିତ ମିଳିତ ହୋଇ ଏହା ଧାମରାଠାରେ ବଙ୍ଗୋପସାଗରରେ ପଡ଼ିଅଛି | ଏହାର ନଦୀ ଶଯ୍ୟାରେ ରେଙ୍ଗାଲୀଠାରେ ଗୋଟିଏ ଡ୍ୟାମ କରାଯାଇ ଜଳବିଦ୍ୟୁତ୍ ଶକ୍ତି ଉତ୍ପାଦନ କରାଯିବା ସଂଗେ ସଂଗେ ଜଳସେଚନ ମଧ୍ୟ କରାଯାଉଛି | ଖରଶ୍ରୋତା ଏହାର ମୁଖ୍ୟ ଶାଖାନଦୀ | ବ୍ରାହ୍ମଣୀ ନଦୀ କୂଳରେ ଗଢି ଉଠୁଥିବା ଶିଳ୍ପ ଯୋଗୁଁ ଏହାର ଜଳ ଦୂଷିତ ହେବା ସଂଗେ ସଂଗେ ନିମ୍ନମାର୍ଗରେ ଏହାର ଜଳ ଉପରେ ନିର୍ଭର କରୁଥିବା ଗ୍ରାମବାସୀମାନଙ୍କର ସ୍ଵାସ୍ଥ୍ୟ ଉପରେ ଖରାପ ପ୍ରଭାବ ପଡୁଅଛି | ଏହାର ଦୈର୍ଘ୍ୟ ପ୍ରାୟ ୭୯୯ କି.ମି |

ସୁବର୍ଣ୍ଣରେଖା

          ଛୋଟନାଗପୁର ମାଲଭୂମିରୁ ବାହାରି ପଶ୍ଚିମବଙ୍ଗ ମଧ୍ୟଦେଇ ପ୍ରବାହିତ ହେବାପରେ ବାଲେଶ୍ଵର ଜିଲ୍ଲାକୁ ପ୍ରବେଶ କରିଅଛି | ଏହି ଜିଲ୍ଲାରେ ପ୍ରବାହିତ ହେବାପରେ ବଙ୍ଗୋପସାଗରରେ ପଡ଼ିଅଛି | ଏହାର ଦୈର୍ଘ୍ୟ ୪୩୩ କି.ମି |

ବୈତରଣୀ

          କେନ୍ଦୁଝର ଜିଲ୍ଲାର ଗୋନାସିକା ପର୍ବତରୁ ବାହାରିଛି | ସାଳନ୍ଦୀ ବୈତରଣୀ ନଦୀର ଏକ ଉପନଦୀ | ମୟୁରଭଞ୍ଜ ର ମେଘାସନ ପର୍ବତରୁ ସାଳନ୍ଦୀର ଉତ୍ପତ୍ତି | ଏହାର ଦୈର୍ଘ୍ୟ ୩୬୫ କି.ମି |

ବୁଢ଼ାବଳଙ୍ଗ

          ମୟୂରଭଞ୍ଜ ଜିଲ୍ଲାର ଶିମିଳିପାଳ ପାହାଡରୁ ଉତ୍ପତ୍ତି ଲାଭ କରି ମୟୂରଭଞ୍ଜ ଓ ବାଲେଶ୍ଵର ଜିଲ୍ଲା ମଧ୍ୟ ଦେଇ ପ୍ରବାହିତ ହେବା ପରେ ସମୁଦ୍ରରେ ପଡିଅଛି | ବାଲେଶ୍ଵର ଓ ବାରିପଦା ସହରଦ୍ଵୟ ଏହି ନଦୀକୂଳରେ ଅବସ୍ଥିତ | ବରେହୀପାଣି ଜଲପ୍ରପାତ ଏହି ନଦୀ ଶଯ୍ୟାରେ ଅବସ୍ଥିତ | ଏହି ନଦୀର ଦୈର୍ଘ୍ୟ ୧୭୫ କି.ମି |

ଋଷିକୁଲ୍ୟା  

          କନ୍ଧମାଳ ଜିଲ୍ଲାର ଋଷି ପର୍ବତରୁ ବାହାରି ବଙ୍ଗୋପସାଗରରେ ପଡ଼ିଛି | ଧନେଇ , ବଡ଼ନଦୀ ଓ ବାଘୁଆ ଏହାର ଉପନଦୀ ଓ ଏହାର ମୁହାଣରେ  ତ୍ରିକୋଣଭୂମି ନାହିଁ | ଏହାର ଦୈର୍ଘ୍ୟ ୧୬୫ କି.ମି |

ବଂଶଧାରା

          କଳାହାଣ୍ଡି ଜିଲ୍ଲାର ପାର୍ବତ୍ୟାଞ୍ଚଳରୁ ବାହାରି ଆନ୍ଧ୍ରପ୍ରଦେଶରେ ପ୍ରବେଶ କରିଛି | ମହେନ୍ଦ୍ରତନୟା ଏହାର ଏକ ଉପନଦୀ | ମହେନ୍ଦ୍ରତନୟା ନଦୀ ମହେନ୍ଦ୍ରଗିରିର ଉତ୍ପତ୍ତି ଲାଭ କରି ବଂଶଧାରା ସହିତ ମିଳିତ ହୋଇଛି | ଏହାର ଦୈର୍ଘ୍ୟ ୨୩୦ କି.ମି ଓ ଏହା ଆନ୍ଧ୍ରପ୍ରଦେଶର କଳିଙ୍ଗପଟ୍ଟନମ ଠାରେ ସମୁଦ୍ରରେ ପଡ଼ିଛି | ସାଳନ୍ଦୀ, ଇନ୍ଦ୍ରାବତୀ , କୋଲାବ୍,ଶାବରୀ, ମାଛକୁଣ୍ଡ, ନାଗାବଳୀ, ବାହୁଡା ଆଦି ଓଡ଼ିଶାର ମାଲଭୂମି ଅଞ୍ଚଳରେ କେତେକ ନଦୀ | ଡୁଡୁମା ଜଳପ୍ରପାତ ମାଛକୁଣ୍ଡ ନଦୀ ଶଯ୍ୟାରେ ଅବସ୍ଥିତ |
________________________________________________________________
Tag:

Rivers, Rivers Of Odisha, The Mahanadi, The Baitarani, The Subarnarekha, The Bramhani, The Budhabalanga, The Rushikulya, The Bansadhara,Odisha, Balasore, Odia Language